Mangan spurt 

Hví bert ein bíðilisti?

Orsøkin til, at vit hava valt at hava ein bíðilista fyri alt landið, er, at hesin hátturin at skipa bíðilistan uppá gevur ein fleksibilitet, sum fleiri bíðilistar ikki geva.
Siga vit t.d. at ein av okkara limum bert hevur søkt um bústað í Vágunum, men so seinni ynskir at flyta til Eysturoynna, so kann viðkomandi leggja Eysturoy aftur at sínum ynskjum, uttan at skula aftast á bíðilistan fyri Eysturoynna. Tað sama ger seg galdandi um viðkomandi má flyta vegna arbeiði, skúla ella sjúku.
  

Kann eg býta mítt nummar um við onkran annan?

Nei. Títt nummar á bíðilistanum er persónligt, og tú kanst undir ongum umstøðum býta um nummar við onkran annan.
 

Hvat merkir tað at vera hvílandi limur?

Ert tú hvílandi limur, fært tú ikki tilboð um bústaðir. Tað er smart at skriva seg upp sum hvílandi lim, um tú ikki hevur tørv á einum leigubústaði fyribils, men ynskir at betra um møguleikan at fáa ein bústað seinni. 

Sum hvílandi limur flytur tú upp eftir bíðilistanum, so hvørt fólk framman fyri teg taka av tilboðum um bústaðir og tí fara av bíðilistanum. 

Tú kanst altíð gerast søkjandi limur aftur við at boða okkum frá hesum umvegis teldupost bustadir@bustadir.fo
 

Um eg fái tilboð um eina íbúð, og taki av, kann eg so framleiga hana til onkran annan?  

Nei, tað kanst tú ikki, tí tú hevur búskyldu á adressuni.

Undantakið kann vera, um tú í eina tíð hevur búð í eini íbúð hjá okkum og mást flyta til annað øki í landinum ella til annað land, t.d. orsakað av sjúku ella í lestrarørindum, so kanst tú søkja um at sleppa at framleiga íbúðina. Verður umsóknin játtað, so kanst tú framleiga í upp til tvey ár. Set teg í samband við okkum um hetta, um tú hevur ivamál. 
 

Kann ein persónur, sum er 15 ár leiga eina íbúð?

Ja, tað letur seg gera um viðkomandi rindar leigu til tíðina og annars heldur húsreglurnar. Við tíðini vóna vit tó at útvega lestraríbúðir til hendan bólkin.
 

Eg eri lesandi. Nær kann eg vænta mær eina lestraríbúð?

Vit arbeiða við at útvega lestraríbúðir. Føroya Løgting hevur lógargrundarlagið fyri at stuðla hesum, men enn er hesin stuðul ikki samtyktur.
 

Hvussu nógv fólk kunnu búgva í eini íbúð?

Talið av fólki í einum bústaði má vera passandi til støddina á bústaðnum.
 

Vit arbeiða fyri at trivnaður er í topp

Eg havi eitt barn á bíðilistanum, sum hevur fingið eitt gott nummar. Kann eg/vit sum foreldur flyta inn til barnið?

Ja, vit blanda okkum ikki uppí, hvørjum okkara leigarar búgva saman við. Barnið kemur tó at vera skrásett sum leigari og at hefta juridiskt fyri leigumálið. Flytur barnið út, so verður leigusáttmálin uppsagdur, uttan at foreldrini kunnu yvirtaka hann.
 

Hvør er leigukostnaðurin á íbúðunum?

Kunna teg um okkara leigubústaðir og leiguprísir her. Legg til merkis, at leiguprísirnir eru uttan nýtslu. 

Leigan er ásett eftir kostnaðinum á íbúðini og øðrum viðurskiftum, sum kunnu vera ymisk frá býlingi til býling.
 

Um ein íbúð hjá Bústøðum er tøk, kann ein, sum ikki er limur so flyta inn?

Nei, øll, ið búgva hjá Bústøðum, skulu vera limir í bústaðafelagnum.