BÚSTAÐIR KEYPA 24 ELDRAÍBÚÐIR Í KLAKSVÍK

Dagfest 18-09-2014  

Í vikuni varð avtala gjørd við Klaksvíkar kommunu, um at Bústaðir framyvir fara at reka og leiga út eldraíbúðirnar á Kráarbrekku.

Bústaðir hava saman við Klaksvíkar kommunu átt og fíggjað Sjálvsognarstovnin undir Kráarbrekku, men nú eru íbúðirnar seldar Bústøðum úr sjálvsognarstovninum. Keypsprísurin var slakar 18 mió. Jógvan Skorheim, borgarstjóri í Klaksvíkar kommunu og formaður í stýrinum fyri Sjálvsognarstovnin, fegnast um at Bústaðir nú hava keypt íbúðirnar, tí meðan kommunan hevur nógvar ymiskar uppgávur, er útvegan og umsiting av leigubústøðum fremsta endamálið hjá Bústøðum.

Týskvøldið vóru umboð frá Bústøðum, saman við umboðum frá Klaksvíkar kommunu, og kunnaðu leigararnar á Kráarbrekku um keypið. Andras Róin, stjóri á Bústøðum, fegnast um keypið, sum hóskar væl saman við teimum ætlanum og málsetningum, sum Bústaðir hava sett sær. Bústaðir hava við teimum 24 íbúðunum í Klaksvík nú 72 íbúðir kring landið.

viðkomandi

< >