FYRSTA ÍBÚÐARHÚSIÐ Á ÓÐINSHÆDD REIST

Dagfest 09-04-2015  

Tað gongur væl við byggiverkætlanini á Óðinshædd í Havn, har 22 leiguíbúðir verða bygdar. Nú verður fyrsta av sjey íbúðarhúsum reist. íbúðirnar eru frá 54 til 86 fermetrar til støddar, og tað eru tvey-, trý- og fýrarúms íbúðir.

Í juni 2014 varð lendisarbeiðið byrjað, og hóast tað hevur verið avbjóðandi, tí veturin hevur verið ringur og stórur hæddarmunur er á økinum, so hevur lendisarbeiðið gingið rímiliga væl. Samstundis sum lendisarbeiðið hevur verið í gongd, hevur høvuðsarbeiðstakarin, Sp/f Bulur, bygt elementini í byggihøll í Kollafirði.

“Byggiverkætlanin gongur væl, og tíðarætlanin sigur, at tað verður klárt hjá 22 leigarum at flyta inn í íbúðirnar komandi vár”, sigur Bogi Jacobsen, tekniskur leiðari á Bústøðum.

Tað er royndi arkitetkturin Palli Gregoriussen, sum hevur teknað íbúðirnar. Dentur er lagdur á góðsku, funktionalitet og estetik. Samstundis verður roynt at halda kostnaðin á verkætlanini niðri fyri at tryggjað ein sømiligan leigukostnað.

“Gongst sum ætlað, vænta vit at húsaleigurnar fara at liggja ímillum fýra og seks túsund krónur um mánaðin, alt eftir íbúðastødd”, sigur Andras Róin, stjóri á Bústøðum.

Íbúðirnar eru ætlaðar øllum samfelagsbólkum, og verða tí ymiskar í stødd og sniði. Tærr lúka øll nútímans krøv til bygging. Tær hava sera góð ljós- og ljóðviðurskifti. Hitapumpur verða brúktar, so orkunýtslan verður lág. Inniluftin verður tryggjað við ventilatión í øllum íbúðunum.

Umhvørvið á Óðinshædd er vakurt og friðarligt, og úr íbúðunum verður sera gott útsýni yvir Nólsoyarfjørð. 
 

Trýst her fyri meiri kunning um verkætlanina

 

viðkomandi

< >