NÚ VERÐUR BYGT Á ÓÐINSHÆDD

Dagfest 26-05-2014  

Í morgun, 26. mai 2014, vórðu umboð frá Bústøðum, Tórshavnar kommunu og arbeiðstakarunum samlaði saman uppi á Óðinshædd í Havn, tá spakin varð settur í fyrstu verkætlanina í høvuðsstaðnum.

Jóhann Mortensen, formaður í stýrinum fyri Bústaðir, Bjarni Djurholm, nevndarformaður fyri Sp/f Bul, og Heðin Mortensen, borgarstjóri í Tórshavnar kommunu søgdu nøkur orð. - Í hesi verkætlanini, sum Bústaðir hava verið við frá byrjar, eru bæði smáar, miðalstórar og størri íbúðir. Tað merkir, at tá hesar verða bodnar limunum, kunnu Bústaðir eisini bjóða út bíligari íbúðir, segði Jóhann Mortensen millum annað. Hann legði afturat, at Bústaðir hava álit á Buli, at úrslitið verður gott, og at byggiprísur og tíðarætlan fara at halda. Bjarni Djurholm, nevndarformaður fyri Sp/f Bul, segði seg vera vísan í, at hetta er ein uppgáva, ið Bular megnar at loysa til fulnar. Hann nevndi, at seinastu 30 árini hevur Bulur verið við til at bygt umleið 300 sethús, umframt aðrar verkætlanir.

Heðin Mortensen, borgarstjóri í Tórshavnar kommunu, segði í síni røðu, at hann fegnast um, at Bústaðir endiliga eru komin í gongd við at byggja íbúðir í Havnini. Hann førdi fram, at tað er jaligt at útboðið av leiguíbúðum í Havnini nú verður størri og meiri fjøltáttað. Íbúðahúsini eru teknað av kenda arkitektinum J. P. Gregoriussen, Hans Vilhelm Lützen fer at gera grundøkið byggibúgvið og Sp/f Bulur fer at byggja íbúðirnar. Íbúðirnar verða frá 63 til 86 fermetrar til støddar, og verða væntandi lidnar um eitt gott ár.

viðkomandi

< >