ÍBÚÐARBYGGINGIN Á OYRARBAKKA LIÐUG

Dagfest 23-05-2014  

Í dag var móttøka á Oyrarbakka í sambandi við at verkætlanin Undir Bjørgum, ið fevnir um átta íbúðir, er liðug. Íbúðirnar, sum Sp/f Jóan Petur Vang hevur bygt fyri Bústaðir, vórðu yvirtiknar í dag.

Jóan Petur Vang, byggimeistari, Jóhann Mortensen, stýrisformaður fyri Bústaðir, Heðin Zachariassen, borgarstjóri í Sunda kommunu, og Bogi Jacobsen, tekniskur stjóri hjá Bústøðum høvdu orðið á móttøkuni.

- Arbeiðið hevur gingið væl, tíðarætlanin hevur hildið, ongin meirkostnaður hevur verið og arbeiðið er sera væl úr hondum greitt, sigur Andras Róin, stjóri á Bústøðum.

Íbúðirnar eru ljósar og nútímans við øllum hentleikum. Tær eru millum 82 og 92 fermetrar og hava tvey og trý sovikømur. Harumframt hevur hvør íbúð sítt egna rúmliga goymslurúm og ein hjall uttanfyri. Leiguprísurin fyri hesar íbúðirnar verður frá 4.600 til 5.400 kr alt eftir stødd. Íbúðirnar verða nú bjóðaðar úr til teir limirnir á bíðilistanum, sum ynskja bústað í øki 2, Eysturoynni og øki 4, Norðstreymoy.

Sum vanlig mannagongd er hjá Bústøðum, verður raðfylgjan á bíðilistanum fylgd. Almenn móttøka verður seinni, og tá fáa øll møguleika at síggja íbúðirnar.

Sp/f Jóan Petur Vang fer í næstum undir sína næstu verkætlan fyri Bústaðir, tá fyritøkan fer at byggja Skansa íbúðirnar Yviri við Strond í Havn. Bústaðir – Føroya bústaðafelag takka Sp/f Jóan Petur Vang fyri sera gott samstarv.

 

Trýst her fyri meiri kunning um íbúðirnar

 

viðkomandi

< >